|
TOUN JUNCTION
A boorich o birdies, blaik an birlin, heezin an furlin.
A skyte o skurries slidderin doon the win.
A breenge o shoppers hashin ower the road.
A bleeze o boozers hyterin doon the brae.
A chaw o chuddies stukken doon like bannocks.
A craik o corbies wallopin ower the howfs.
A skirl o schule quines swingin pyokes o buiks.
A doonpish dribblin doon the cassies croon.
A bauchle o auldies shauchlin ower the crossin.
A birr o larries hotterin on the tarmac.
A skitter o stirlins jinkin like confetti.
A wheech o ambulances stappt wi skaith.
A dauchie o wardens keekin inno cars.
A puckle o office quines on teeterin sheen.
A bleep o mobiles clapt tae meevin lugs.
A sniff o mongrels peein ower wheelies.
Bumfus o buggies bumpin ower branders.
A shoogle o artics dirdin ower lowse chukkies.
A wacht o cushies bobbin ower the cassies.
A stooshie o spurgies chitterin on the lums.
A shargaret tree its branches showdie powdin.
A dunt o drillers rivin up the road.
A reeshle o papers. Get yer Dailies here!
A spalt o dug keech splytered on a steen.
A stride o loons wi gallus sark tails flappin.
A hoaster hackin oot a glob o glut.
A beggar in a doorwye priggs fur siller.
A pirn-taed wifie humfin hame her eerins.
A van wi ledders jinkin roon a neuk.
A trawl o taxies slinkin doon back wynds.
A cowkin quinie cowpin ower a cash pynt.
A twa-fauld bodach, neb near tae the grun.
The provost's limo poorin through the toon.
A skoosh o watter skytin frae a dub.
A trail o tabbies trampit in the glaur.
Sheena Blackhall
[To view the image in more detail, please click on its thumbnail.]
|
